By: Vigilante

• De closet ambassador telling everybody dat he tek he name outta people mout.  And he ain do like de frilly mout deputy.  He mek sure dat nobody can tek back anyting from him after dey done give him.

• De frilly mout deputy say dat he not tekking it so.  He say dat it ain now he trying and he not getting through at all.  He say dat if he and Idi Amin and de closet ambassador use to be under de bridge together and dey could get through, he could get through too.

• Idi Amin tell de fallen angel, Tommy Tuck Tuck and de massive fella dat is only dem left now to do like him and de closet ambassador.  He tell Tommy dat as soon as he get through, he gon carry him to de Far East wid him to celebrate like how he carry Sack Sack.

• Idi Amin get to hear dat certain people who use to be wid him planning to sing calypso gainst him dis year.  So he done send back to tell dem dat he not Douggie.  Anybody who sing anyting gainst him or de government not gon have any wuk de next day nor gon stay on any board dat dey on.

• He tell Ole Mother Hubbard dat all who singing bout he dere wid dey aunty better know what dey doing.  He say dat he talking wid he lawyer dem bout suing because he don’t interfere wid nobody aunty who have more dan one man.

• Idi Amin say dat he ain care if is “Mary Had a Little Lamb” or “Jingle Bells” people in de finals singing.  Nobody getting pass de fuss round if dey sing any song on him nor on dey aunty boyfriend.

• People who was dere say dat de juicy minister and Idi Amin had one busing in Cabinet.  Dey say dat Idi Amin ain idle to tell him dat he is de wuss G.A. he ever see.  He tell him how he incompetent and lazy and a total waste a time.   Dey say dat de G.A. tell him to fire him if he bad because he gon have to pay back de millions dat he convert because de money come from he family.

• Dey say dat de juicy minister mek de mistake and tell him dat he sister tying up all de lawyer dem and de court when she lock up de place and take off go look for she Bajan people dem and go coop she wasband who living in a disco in de East.

• Idi Amin say dat he ain care how much people resign from de bank or from Social Security.  He gon get people to do as he say or dey could go.  And when dey go is good for him because he does just put one a he famalay in de position.

• De Marriott man say dat he gon do like Idi Amin.  He not paying for nutten outta he pocket.  He gon find a way to get de government to pay de money.  If Idi Amin could bring back receipt for chocolate bar and get government pay it for him, picture dem load a hundred thousand dollars dat de court say dat he must pay.