By: Vigilante

• When Idi Amin people dem in Canada get to find out dat he was going England and France wid de fallen angel, he tell Idi Amin dat if he don’t come Canada right away, all hell gonbruk loose. He gon go public and talk what he know. He tired a playing second fiddle to de fallen angel, Walla Walla, Tommy Tuck Tuck, Sack Sack and de massive fella.

• Idi Amin was well glad to say dat he going Canada for a checkup so dat he couldaget way from de convention. He tell somebody dat it look like he cut a whip to cut he arse because is long time he did telling Baggies to undermine Uncle V like how he did doing Uncle D and now Baggies after he wuk.

• When he see dat he and Baggies cut from de same mould, he try pull back from him and tell Uncle V all dat Baggies was doing. But he still had to give dem anyting dat de two a dem wanted because dey done know long time dat he was crooking dem.

• People in de know say dat is Idi Amin who was to get lock up because dey got him on tape talking bout all kinda illegal tings. But somebody pinch and ley him know dat Scotland Yard was waiting for him on de airport. So last minute he cancel de trip quick, quick.

• Dey say dat is a good ting dat Ole Mother Hubbard does have she Shilling Oil wid her all de time. People who was dere say dat Idi Amin start to froth like a hog and nearly tekeen when he hear what happen on de airport and know dat it was to be he.

• All de time he on he way to Canada, dey say dat he wondering if dey was gon divert de plane and lock him up. Through dat dey say he ain drop sleep no time at all on de plane for how he so frighten.

• Dey say dat he went go check on de money what get converted and join another religion. Dey say dat after St. Martin get mash up, all a dem who get stem Cell, Herpes and converted money moving it piece, piece till dey move all.

• Dey say dat somebody tell Baggies dat Uncle V set someting on him. Das what mek he hogging off all who call een go ask him question on he programme because he carn sleep when night come.

• Idi Amin nearly tek een when he hear de ISIS terrorist on de radio talking on de overseas programme. He say dat he not tekking it so at all. When he come back from getting he toe nail dem cut and polish, de ISIS terrorist gon see how barley grow.

• Dey say dat Idi Amin gone go check see if de ISIS terrorist really got dual citizenship and he trying to see if he gon could threaten to mek him pay back all what he mek when he did dere if he don’t stop banging he mout on de radio.