• Great grandmother Ole Mother Hubbard nearly tekeen when she hear dat Scotland Yard looking for her to find out what she know bout Mr. Birdie.

• Great grandmother Ole Mother Hubbard nearly tekeen when she hear dat Scotland Yard looking for her to find out what she know bout Mr. Birdie.

• She tell somebody dat she carn tek no jail in she old age.  Anybody ask her anyting, she gon sing like a birdie.  She say is fast she fast and like to be in tings why dese tings happening to her.

• She say dat Dougie did done warn her from Humpty Dumpty.  She was suppose to be home looking after she plant dem, she grand and she great grand dem.  Instead a dat, she up and dung de world wid Humpty Dumpty playing young in all kinda wild after party.

• She say dat she ain get no gift from nobody.  She got endless a watch and endless a shoes and she custom to food since she small.  So if anybody from Scotland Yard ask her anyting bout shoes and watch, she gon send dem to de A-Dree.

• De A-Dree say dat he not tekking no fall for nobody.  He pay for he house outta he pocket.  He ain know nutten bout no shoes and no watch and when ScotlandYard come ask him anyting, he gon tekeen wid de pressure like when dey say dat dey have tape on him and go up de hospital go hide.

• Is de A-Dree who went go collect de watch and de shoes.  Dey say dat is a errand boy he be for Humpty Dumpty because he ain able and he trying to keep de big wuk.

• De bicycle lady tell she lady friend dat if Scotland Yard come ask her any question, she gon stop dye she hair, done wid de jerry curl and play crazy.  She say she ain know nutten bout no watch nor no shoes.  And she not going jail now she done pass she three score and ten for a little piece a food.

• De PAM people dem so shame dey don’t know what to do.  Dey say dat since Humpty Dumpty join up wid dem and tek over, is pure embarrassment every day.  Dey say dat dey gon wait see if it gon blow over because dey clueless like de government.  Dey don’t know what to do.

• De frilly mout deputy ain want Humpty Dumpty to resign because if he get de big wuk he gon carn go way to all de carnival dem, nor go everywhere dat pan knocking.  And he gon carn wear dem piece a pretty pants.  And he gon carn be wukking up on he man friend dem and have dem wukking up on him.

• But he say dat if anybody throw any drink in he face, he not gon have to be chucking dem off.  He security gon do dat for him.  And he not gon ask nobody for no watch and no shoes.

• Humpty Dumpty tell de bad wud minister dat from de time he put on de traffic lights dem all what he do years ago coming to light.  He tell de bad wud minister dat if Click Clock dem find out where he have de converted money stash way, de lights dem coming dung.